තාප්පයක් සහ බල්ලෙක් කෙටිකතාවේ විවාහ ජීවිතයේ සියුම් උපහාසයත්, විශ්‍රාමයෙකුගේ නොනිත් කුතුහලයත් මනාව පෙන්නුම් කරයි.
අප රට එක්තරා අහිංසක ජන කොටසක් සැමදා ඔවුන්ගේ අසරණ කම නිසා ම, පවතින ආණ්ඩුවේ හෝ ඉළඟට පත්වෙතැයි සිතෙන ආණ්ඩුව ට හෝ පක්ෂව එහි දේශපාලන රැළි, මැයි දින රැළි අදිය ට ඉදිරිපත් වෙති. "මැයි දින" කෙටිකතාවේ හෙළිදරව් වෙන්නේ මැයි දිනයක් තුලදී අනතුරකට ලක් ව මියැදුණ කෙනෙකු, ජීවිතය පුරාවට තනියෙන් තමනට ලබා ගත නොහැකි දෑ ඉටු කරගැනීමට දේශපාලඥ්ඥයින්ගේ උවමනාවට ක්‍රියා කල අයෙකුගේ අයුරුයි.
සංවර්ධනයයි විශ්වාස කරන්නක් ගමට කඩා වැද දැන් කලක් වේ. පෙර නොවූ විදිහකට ගැමි බිරියන් ද තම රූප ලාවන්‍ය පිළිබඳ සිතන්නට පටන් ගෙන ඇත. ඉතා කෙටි කතාවකින් මෙම ප්‍රවනතාව පෙන්වා දීමට කතුවරයා සමත් වී ඇත. ( ඩිජිටල් )
"අඹ දඹ නාරං කෙසෙල් දෙල්" කෙටි කතාවෙන්, රටේ සිදුවන වෙනස්කම් ඉදිරියේ ශාස්ත්‍රීය සංගීත කරුවා ද ජනප්‍රිය සංගීතය වෙත ඇදී යාම නොවැලැක්විය හැකි බවක් අඟවයි. කෙටි කතාව ගොඩනැගී ඇත්තේ පැරණි පෙමක පදනමක් මත වීම එහි රසවත් බව තීව්‍ර කරයි.
"හෙරිටේජ්" කෙටිකතාවෙන් අප රට ට පැමිණි යුරෝපීය රටේ කොටසක් හෝ මුළු දිවයින ම හෝ අත්පත්කරගත්තවුන් නිසා අප රටට උරුම වූ ඉතිහාසයත්, සමහර පවුල් පරම්පරාවන් පිළිබඳවත් ඇඟවීමක් කරයි. අද වන විට ගාලු කොටුවේ බිම් පර්චසයක අගය, මෙම යටත් විජිත උරුමයේ ආර්ථික වටිනාකමේ ඉහළ අගය පෙන්නුම් කරයි.
අප පිටස්තර ලෝක‍යට පෙන්වන තරම් අපි සංවේදි ද? අප සංවේදී වන්නේ අප අපහසුතාවට ලක්වන්නේ නැති නම් පමණක් ද? අප ගැන අපෙන් ම විමසන ආරේ අගනා කෙටි කතාවකි "ඇබින්දක් වෙනස් කල ඇත්ත කතාවක්".
ප්‍රේමය සුන්දරය. විවාහයේ වගකීම ඒ සුන්දරත්වය ට පමුණුවන හානිය සුළුපටු නොවේ. වෙන්වුණු යුවලක්, විවාහයේ වගකීමෙන් මිදී නැවත හමු වූ කලක, ස්වභාවික ලෙස ඔවුනොවෙන් අතර නැවත පෙමක් හට ගැනිමේ අපූරු කතාවයි "කළු සුදු නොවේ".
අසූවේ වැඩ වර්ජනය සිදු වූයේ මා ඉතා කුඩා කල ය. මා පසුව අසා කියවූ දේ අනුව එහි ප්‍රතිඵල වශයෙන් කෙනෙක් දිවිනාසා ගත්තේය; තව අයෙක් තම ස්ථාවරයේ සැමදා සිතියහ. අයෙක් ආයාචනා කොට නැවත රැකියා ලාබා ගත්තෝය. "කුඩා කල මහා ගංගාවක් සේ දුටු දේ වැඩිහිටියකු ලෙස දකිනා විට දොළපාරක් බව පෙනීමමිනිස් අත්දැකීම් ආශ්‍රිත නියාමයකි." - මෙම නියාමය ඔස්සේ කථිකයා කතාව කියාගෙන ගිය ද,එහි නොසිතූ ආරේ වෙනසක් සිදු වේ. අද අපට එය දොළ පාරක් වුවද, එදා ඒ ගංගාවට ගසා ගිය අයට එහි ප්‍රචණ්ඩත්වය කිසිදා මතක නොවුණු ඇත. ( පොතක් නොවේ, පොතක එක පිටුවක් )
"ඔහු ඔහුම ද?", කුඩා කල මිතුරෙකු, වැඩිහිටියෙකු වන විට කෙතෙරම් වෙනස් විය හැකි යන්න ද, පිළිබඳ අපූරු කතාවකි. අපේ ජීවිත කතා ලියැවෙන්නේ අපූරු එහෙත් එකිනෙක වෙනස් ආකාරයක ට ය.
මාතෘභූමි, ඕස්ත්‍රේලියාවේ හමුවන ලාංකික විශ්‍රාමිකයකු සහ ඉන්දියානු විශ්‍රාමිකයින් දෙදෙනෙකු අතර ඇතිවන ලුහු කතාබහ මත ගොඩනැඟුණු කතාවකි. උපන්භූමිය හැර ගිය ද, අප බොහෝ අයට ඒ හා බැඳෙනා යම් අතහැර නොහැකි බැඳීමක් ඇත.
මෙහි එන නිර්මළා නවකතාව, මියගිය තම පෙම්වතිය වෙනුවෙන් දිවිය ම තනියෙන් ගත කරන්න ට තීරණය කල පුරුෂයෙකුගේ කතාවයි. මේ කතාවේ එතරම් අපූරත්වයක් නොදුටුවෙමි.
සමස්තයක් ලෙස රසවිඳිය හැකි ආරේ කෙටිකතා බොහෝමයක් ඇති කෙටිකතා පොතකි. මම ඇත්ත වශයෙන් ම මෙය මගේ ප්‍රධාන කියවීමේ කාලයෙන් පරිබාහිරව, ලැබෙන කෙටි විරාමයන් භාවිත කොට කියවූවකි, මෙය. අයෙකු ට කියව්වා ට පාඩුවක් නොවෙනා පොතකි.
No comments:
Post a Comment