මමත්වතා - ඉසුරු චාමර සෝමවීර

 අද උදෑසන වන තෙක්, අන් පොත් කිහිපයක් කියවනා අතර, කවි පොත් දෙකකට ද දවසක් හැර දවසක් හෝ වේලාව උත්පාද කර ගත්තෙමි. එකක්, මා ගිය වසර අවසන කියවීමට තනා ගත් සැලැස්මට ඇතුලත්, ලක්ෂාන්ත අතුකෝරාල ගේ 'ලියසැව් ලිහී ගිය ගනසාමඬුලු" ය. එය කියවීම හේතුන් දෙකක් නිසා මන්දගාමීය (ඒ පොත ගැන යමක් පවසන දිනෙක වැඩිවිස්තර පවසන්නම්). අනෙක මීට සතියකට - දින දහයකට පමණ පෙර, අන් පොතක් එක්කාසු කරගැනීමේ අටියෙන් සරසවි පොත් හලට ගොඩ වූ විට නෙත ගැටී මිල දී ගත් ඉසුරු චාමර සෝමවීර ගේ "මමත්වතා" ය. අද උදැසන එහි කවි පොතේ කවි 45 ම වරක් හෝ බලා අවසන් කෙරුවෙමි. එහි සරලත්වයත්, ඒ සරලත්වය තුල සැඟ වූ ගැඹුරත් එම කවි පොත ඉක්මනින් කියවීමට හේතු සාධක වූයේය. තාණ්ඩව, සහ අප දෙදෙනා මැද මහ මුහුද අප ට ගෙන ආ, ඒආශ්චර්‍යයක් බඳු වූ සරලත්වයක ගැඹුරේ ම අලුත් මානයක්, අප ට මහත් වින්දනයක් ගෙන ආවේය.

මා සිත් ගත් කවි කිහිපයක් තැන නතර වෙමි.

"හැරෙන්නත් බෑ දැන්
පරක්කුයි

බදාදා පොළෙන් ගෙනැවිත්
ගෝවා, තක්කාලි
බටු, මෑ කරල්, කංකුං
බිත්තර, හුරුල්ලන්
ශීතකරණයෙ අසුරමි

ඔෆිස් යමි, එමි
නාඳුනන මුහුණක
යම් හුරුපුරුදු ලකුණක්
සොයා මොහොතක් නවතමි

..."

40 නම් වූ මේ කව සිතට දැනුන එකකි. වෘත්තීය ජීවිතයේ පෞරෂත්ව වර්ධනය වෙනුවෙන් වූ අනේක පුහුණුවීම් තිබුන ද, ඒ මගින් රටාවෙන් මිදීම ගැන උපදෙස් ලැබුවද,  (සහ වෘත්තීය අවශ්‍යතා හේතුවෙන් යම් සුළු වෙනස්කම් සිදුකරගත්ත ද,)  'හැරෙන්නට බෑ දැන් - පරක්කුයි' - කිමද අවදානම් නොගන්නා අප ජීවිත මතින් රෝපනය වන බීජ පැළ වලට අවදානමක් ගෙන ආ නොහැකිය. අපූරු කවියකි.

"උන් මාව දන්නවාද ?
මං උන්ගෙන් එකෙක්ද ?
මට සැකයි
තමුන් ගැන තීරණ ගන්න බැරි
එක එකා එක්කහු වෙලා
මහජනතාව වෙනුවෙන්
තීරණ ගන්නවා

...

අනේ මන්දා
ඇයි නන්දා එහෙම කිව්වේ

මහජනතාව
මහ බයක් ගේනව"

ලංකාවේ මහජනතාව නම් අතිශය බහුතරය නම් කිසිදු වරප්‍රසාදයක් නොලත් කොටසේ එකෙක් වීම ඇත්තෙන්ම මහ බියක් ගේන්න හේතුවක්ම ය. කිමද ඉහලම තැනේ සිට ට්‍රැෆික් පොලිසියේ රාළහාමි දක්වාම ඇත්තන් ඇත්තේ අපට ඉහළින් ය. ලක්ෂ දහයකට ජීවිතයක් ලඝු කෙරෙන ජීවිත සතු මහජනතාවගේ අයෙක් වීම ඇත්තෙන්ම බියට කාරණයකි. දෙකට නැමී වන්දි මුදල් ගන්නා ස්ථාවරය කුඩු පට්ටම් වන දිනයක් දක්වා ම මෙම අවධානම පවතිනු ඇත.

එක්තරා වයසකින් පසුව, පෙර මතක, පැරණි සබඳතා - ඒවා අලුත් නොකර ගත්තද - දෛනික ජීවිතයේ ඒකාකාරි රසය පිරි බනිසේ හමුවන මුද්දරප්පලම් මෙනි.

"ඔබ තුලය තාරා
මඳහසෙහි රාධා
බැල්මක සිටී සීතා

ඔබ

පොලිතින් මල්ලක
එළවළු ලාගෙන
මාළු මැස්ස ළඟ
සාලයන්ට කේවල් කරමින්
මා නොදකිමින්"

කෙවල් කරමින් දෛනික ජීවිතයේ සුළු ජය ගැන සතුටු වන ජීවත් වන ඔබ ද එවන් තත්වයක් විය හැක.

මෙහි අප ට ළබැඳිව අප ආමන්ත්‍රණය කරන ආරේ කවි පංති බොහෝමයකි. එහෙත් කවි එකතුවේ සාරය තේරුම් ගනු වස් ඉහත නිදසුන් ප්‍රමාණවත් වගය, අප විශ්වාසය. මහළු සිංහයෙක්, දෛනික තේ කෝප්පය, සිහින නිවහන, වන දෙවඟන, ඔපූට, මා, ආදි රසවිඳි කවි පංති බොහෝමයකි, මෙහි. එතරම් සාර්ථක කාව්‍ය සංග්‍රහයක් වුව ද, ඉසුරුගේ තාණ්ඩව, සහ අප දෙදෙනා මැද මහ මුහුද තරම් ම මෙහි කවි මා සලිත නොකල බවද කිව යුතුය. එහි කවි වල තිබූ වඩාත් නිදහස වෙනුවෙන් වූ කැමැත්ත, සුලභ නොවූ කවි මැයන්, තමන් කැමති විදිහට ජීවත් වීමේ ඇති ආශාව වෙනුවට,  දැන් ජීවිතය දෙස වඩා උපේක්ෂාවෙන් බැලීමක කවියා නිරත වනවා සේ ය, මේ කවි කියවනා විට අපට දැනුනේ.

එහෙත් සිංහල කවියේ රසිකාවියක් නම් අනිවාර්‍යයෙන්ම කියවිය යුතු කාව්‍ය සංග්‍රහයකි.

ශ්‍රේණිය: ****
ප්‍රකාශනය: විදර්ශන (2023)