සහන් ව මට ඇස ගැසී ඇත්තේ සමාජ ජාල ක්‍රියාකාරිකයෙකු හැටියට ය. සැරින් සැරයේ ඔහුගේ ලිවීම් වල හාස්‍යය සහ උපහාසය මා රසවිඳ ඇත. මීට කලින් ද ඔහු ලිපි මාලාවක් පොතක් ලෙස පළ කර ඇති අතර, මගේ කියවීම් වටයේ අයෙකුගේ ඇගයීමට ලක් වුවද, මට එය කියවීමේ වෙසෙස් උවමනාවක් ඇති නොවීය. එහෙත් මේ කෙටි කතා සංග්‍රහය, එතරම් සම්මාන නිර්දේශ වලට ලක් නොවුන ද, ලියනගේ අමරකීර්ති ගේ ඇගයීමට, සහ පෙර කී කියවීම් වටයේ මිතුරියෙගෙ ඇගයීම හේතුවෙන් කියවන්නට තෝරා ගත්තෙමි. ඇත්තෙන්ම මා කියවුවේත් එම මිතුරියගෙන් ඉල්ලා ගත් පිටපතයි. එහෙත් දැන් කීමට් ඇත්තේ, කියවීමෙන් පසුව මට ම කියා පිටපතක් තබා ගත යුතු තරමේ පොතක් ලෙස මා මෙය සලකන බවකි.
කෙටිකතා අටකින් සපිරි මෙම සංග්‍රහයේ, ඒ ඒ කෙටිකතා මට දැනුනු විදිහ, ඒ කෙටිකතා මා තුල අවදි කල සිතුවිලි මෙසේය.
වෙස්මුහුණ වූ කලි "පන්සලේ කතාවකි." මට චන්ද්‍රප්‍රේම ගෙ පන්සලේ සෙල්ලම මතක් විය. කෞශල්‍ය කුමාරසිංහගේ නිම්නාගේ ඉතිහාසයේ, නිම්නාගේ මිත්තණියගේ අකලට මිය ගිය සහෝදරිය මතක් විය. මෙහි එන ප්‍රසාද් කෙසේ හෝ දිවි ගෙවයි. ඔහු මුහුණ දුන් අභියෝගත් සමඟ ඔහුත් ජීවත්වීමට මගක් සොයා ගත යුතුය. එහෙත් කෙතෙරම් අපහසුතා මැද වුව "ශාන්ත ධම්මට පින් සිද්ධ වේවා" යැයි සියුම් උපහාසාත්මක මිත්‍රශිලි වාක්‍යයකින් මෙහා තම අලුත් ජීවිත තුල අනෙකාට "ඇණයක්" වීමට නොසිතයි. සහන් අවම සහ සංක්ශිප්ත ලිවීමකින් බොහෝ දේ අඟවයි. අපූරු නිර්මාණයකි.
ගම්පහ සිට දෙමටගොඩ දක්වා රේල්ලුවේ ගමනක යෙදෙන නිමංගිට පාසැල් යන කාලයේ සිට ආ මතකයන් ආවර්ජනයක් නිතැතින් ඇති වේ. ස්ටේශමෙන් ස්ටේෂම ට තම මිතුරියන්, ඔවුන්ගෙන් එකල සිටි පෙම්වතුන්, බලහත්කාරකම් කරන්නට පැමිණි සිද්ධීන් ආදී අනේක විදි මිහිරි සහ අමිහිරි මතකයන්ගෙන් ඒවා පොහොසත්‍ ය.
දරුවන් ට තම ජීවිතයේ අනිවාර්‍යයෙන් ම අවැසි දේ, ඔවුන්ගේ දෙමාපියන්ට පිළිගත හැකිද ? නීශ බැංකොක් යන්නේ කුමක් සඳහා ද ? ඇගේ තාත්තාගේ නිවෙසේ ඇගේ ඡායාරූප එකක්වත් නැත්තේ ඇයි ? එකම එක කාරණාවකින් පමණක් නිශා යනු කවරෙක්දැයි අපට හඳුනාගත හැක ? "දුවේ කියා මා අමතන් පියාණෙනි", යන්නෙන් බොහෝ දේ ගම්‍ය වේ. (සිනාසිසී මා එන මඟ)
මෙහි එන සියළුම කෙටිකතවල පාහේ විශේෂත්වය නොසිතූ පෙරලීමකිට කෙටිකතාව ප්‍රක්ෂේපණය වීමයි. වෙස්මුහුණෙහි ප්‍රසාද් අප කතා නායකයාව අඳුන ගනී. රේල්ලුවේ, නිමංගිගෙ ඉරණම අවසන් ඡේ කෙනාදයෙන් අපට හමුවේ. සිනාසිසී මා එන මඟෙහි, එක් ගීතයකින්, එහිත් එක් වචන පෙළකින් බොහෝ දේ පැවසේ. සිව්වන කෙටිකතාවේ "ඔබට සිතැති" කෙනා ට ඇත්තෙන්ම ඔහුත් සිතැති නොවිය හැක. මාරාන්තික රෝගයකට ගොදුරු ව සිටි ඇයට ජීවිතයේ අන්තිම කාලයේ පොඩි හෝ සතුටක් වැරදීමකින් හෝ ලැබුනේ නම්, එයත් සැනසීමක් නොවේද ? අනුවේදනීය කෙටිකතාවකි.
බයගුලු ඇස් ද ඒ වාගේම අනුවේදනීය කෙටිකතාවකි. එහි ඇඟවෙන්නේ සමහර විටෙක, තමන් වඩාත්ම කැමති කෙනා තමනට නොලැබීම ම වාසනාවක් විය හැකි බවකි. අනෙක් පැත්තෙන් චන්ද්‍රාණිගේ බියගුළු ඇස් ම කපිල ව ඇයට ආකර්ශනය කරගත්තා විය හැක -කිම ද එහි යටත් කරගැනීමේ පහසුව ලියැවී තිබෙන්නට ඇත.
මෙම පොතට නම දුන් ප්‍රධාන කෙටිකතාව වූ කලි, පස් දෙනෙකුගේ කට උත්තරයකි. ඉන් සිසුවාගේ පැති කිහිපයක් පෙන්නුම් වේ. ඉන් පස්වැන්න මිය ගිය සිසුවගේ මවයි. ඇය පෙන්වන පැත්ත සැබෑවට ආසන්නය. මිය ගිය සිසුවා ගේ මානසිකත්වය ප්‍රශ්ණකාරී ය. ඔහු ගෙනගිය බොරු රඟපෑම් ම ඔහු ට තම දිවිය කෙට්කරගැනීමට හේතු විය හැකිද ?
සහන් කසීරගේ දක්ෂතාව වනුයේ යම් ඓතිහාසික සිදුවීමක් ශූර ලෙස ගෙතුමක්, පෙරළුමක් මගින් රසවත් කෙටිකතාවකට පෙරලිමට ඇති හැකියාවයි. ජෝන් එෆ්. කෙනඩි ඝාතනය සිදු වූ දින, හඳුනා නොගත් Babushka Lady ව අරමුණු කොට ගෙන ලියැවුනු කෙටිකතාවකි. මෙවන් උපක්‍රම මීට පෙර චිත්‍රපටි ආදියට භාවිත වී ඇත. එහෙත් එය සිංහල කෙටිකතවට භාවිත වූ අවස්ථාවක් මතකයට නොනැගේ.
ඒ වාගේම ඓතිහාසික රාවයක් - එනම් කල්ලඩි පාලම පාමුල සිංදු කියන මසුන් සිටි කතාව, දැඩි ආගමික භක්තිකයෙකු දුටු ආකාරයත්, එයට යම් ඓතිහාසික සිදුවීමක්, හා ඓතිහාසික පරම්පරාවකින් පැවතෙන්නෙක්, භාවිත කර අයුරුත් අපූරු නිර්මාණයක් ලෙස එළි දැක ඇත.
මේ මා කියවීම ඇරඹි අවස්ථාවේ තිබූ බලාපොරොත්තු ඉක්මවා ගිය කෙටිකතා එකතුවකි. සිංහල කෙටිකතා රසවතුන් මගහැරිය නොයුතු කෙටිකතා එකතුවකි.
ශ්‍රේණිය: ****
2022 ප්‍රකාශ වූ කෙටිකතා සංග්‍රහයන් කියවීම - 2
ප්‍රකාශනය - විදර්ශන (2022)
No comments:
Post a Comment