මම ඉංග්‍රීසි ත්‍රාසජනක හෝ රහස් පරීක්ෂක කතා කියවීම, නොසිතාම නවත්වා පාලොස් වසරකට ආසන්න විය යුතුය. සිංහල ත්‍රාස ජනක නවකතාවක් මතකයට නැගෙන්නේ ම නැති තරම් ය ( තරමක් හෝ මතකයට නැගෙන්නේ සුසිත රුවන්ගේ "රාවනා අඩවිය" යි ). මෑතක නිමා වූ පොත් සල්පිලේ වැඩියෙන්ම විකිනුණා යැයි ද, කියවූ සැමදෙනා ගේ ම පාහේ මහත ඇගයීමට පාත්‍ර වූ ද, මෙම නවකතාව මා අතට පත් වන්නේ සිකුරාදා හවසය. සාමාන්‍යයෙන් නිවෙසෙ අනෙක් වගකිම් සහිත සති අන්තයක, පැය 48ට අඩු කාලයකින් මේ පොත කියවා හමාර කලේ, මීට වසර 20 ට -25 ට පමණ පෙර අප පසු කල මැරතන් කියවීම් යුගය මතක් කරමිනි. සාහිත්‍යය දෙයාකාරය - මා සාමාන්‍යයෙන් වඩා ප්‍රිය සාහිත්‍යය සීඝ්‍රයෙන් කියවීම, ඉන් යම් රසාස්වාදයන් උකහා ගැනීමට බාධාවක් යැයි සිතමි. එහෙත් මෙවන් ත්‍රාස ජනක නිර්මාණ කියවීමේ අන් මගක් නැත. එසේ කියවීමට උත්ප්‍රේකය සපයන්නේ කතුවරයාගේ නිර්මාණ විධියයි. මංජුල ඒ කාර්‍යය අති සාර්ථකව ඉටු කොට ඇත. කෘතියේ 80% ඔබ්බට යනතෙක් සියුම් චිකිත්සාවක් කරන්නා සේ, නැතහොත් ඉතා පැහැදිලිව දීර්ඝ ගණිත ගැටළුවක් විසඳන්නා සේ අපේ කතුවරයා තම නිර්මාණය ඉදිර්යට ගෙන ගොස් ඇත්තේ කිසිදු දොසක් කීමට ඉඩක් නැති අයුරිනි. සිදුවීම් සිදුවන්නේ වේගයෙනි, එහෙත් සූක්ෂම සැලැස්මක් අනුව ය. එලෙසම අප කතුවරයා සූක්ෂම ලෙස සිතා හිඩැසක් ඇති නොවෙනාකාරයෙන් එම සිදුවීම් පැහැදිලි කරයි. මට පෞද්ගලිකව, කියවමින් සිටි අන් පොත් හතරකට මද විරාමයක් තබා, මෙය කියවීම පිළිබඳ පසුතැවිල්ලක් ඇති නොවෙනාකාරයෙන් නවකතාව ඉදිරියට ඇදී ගියේය.
කතුවරයා නවකතාව අවසානය පෙනි පෙනී, අංශ 90ක ට වැඩි හැරවුමක් ඔස්සේ ලිංගිකත්වයේ සහ මනෝ විද්‍යාවේ සියුම් අවසරයකින් නවකතාව වෙනතකට හරවයි. මේ පොත ගැන අප මිතුරු මිතුරියන් පසු ගිය සිකුරාදා කතා කරද්දි, මෙය කියවා තිබූ එක් අයෙක් මෙහි අවසානය ගැන විශාල පැහැදීමක් නැති බව පැවසීය. මට සිතුනේ අප නිර්මාණකරුවාට ඇවැසි වුවේ ද මෙම "දෑස රැවටීම" මතු කරලීම බවකි. එම කොටසේ පෙර කොටස් වල තිබූ සූක්ෂම නිරීක්ෂණ නැති බව සත්‍යයකි. කතුවරයා එම "වෙට්ටුව" දැමීම උදෙසා එවන් පිලිවෙතක් පාවිච්චි කරලීම සිතා ගත හැකිය.
කෘතියේ මා සිත් නොගත් කොටසක් වෙතොත් ඒ "අපේක්ෂිත" අපරාධකරුවා ගේ අත් අඩංගුවට ගැනීමය. එම කොටස නවකතාවකට වඩා රූපවාහිනි රහස් පරීක්ෂක නැතහොත් ජේම්ස් බොන්ඩ් චිත්‍රපටියකට ගැලපෙනාකාරයෙන්ය. එතෙක් සුක්ෂම ක්‍රියාදාමයන් හර්කියුල් පොයිරෝ කෙනෙකුගේ මනසක් මතකයට නංවයි.
කතුවරයා නතාලි මුනියේ චරිතය ඉතා සාර්ථකව ගොඩ නගා ඇත. තම රැකියාව වෙනුවෙන් සියල්ල කැප කරන වෘත්තිකයන් පෙන්වා දී ඇති අයුරු අපූරුය. මුනියේ සහ දොස්තර ඉමාන් ගේ සමුගැනීම ද ඉතා සංවේදි ලෙස ගොඩ නැගීමට කතුවරයා සමත් ව ඇත. මෙහි එන ප්‍රධාන චරිත කිහිප දෙනෙකුට ලැබෙන අවසානය මට මතක් කලේ සිඩ්නි ෂෙල්ඩන්ගේ "Rage of Angels" නවකතාවයි. මට සිතුනේ සොෆී ලුග්‍රෝන්ද් චරිතය යම් අයුරකින් මීට වඩා සියුම් නිරීක්ෂණයක් පාඨකයා ට ලබා දුන්නේ නම්, නවකතාව ට තවත් මානයක ත්‍රාසයක්, රසයක් අති කර ගත් තිබූ බවකි ( ඇය ගැන බොහෝ විස්තර මෙහි ඇත. එහෙත් ඇය සුවිශේෂි චරිතයකි ඈ ට තවත් පණ පොවන්න අවකාශ තිබිණි )
සමස්තයක් ලෙස කිවහොත්, ඉතා සාර්ථක, පාඨකයා ඇඳ බැඳ තබනාකාරයේ ශූර ගෙත්තමකි, ලිවීමකි ; ඇත්තෙන්ම වැඩකි ! මංජුල, ඔබ ගේ නිර්මාණය අපූරුය. ජයෙන් ජය! කතුවරයා පොත හඳුන්වා දී ඇත්තේ "A Perfect Suspense Thriller" යනුවෙනි. ඔවු, ඔහු යම් දුරකට මෙහි තමා තෝරා ගත් ශානරයේ perfection ( පරිසමාප්තිය ) වෙත ලඟා වී ඇත.
No comments:
Post a Comment