රන්වල බලකායේ නවතම ගී එකතුව වන යක්කු බොලව් ඇසී මි. මේ ලයනල් රන්වල \ රන්වල බලකායේ සවැනි ගී එකතුවයි. පස්වැන්න වූ "ත්‍රී" පසු ගිය වසර කිහිපය තුල ඇසූ මා වඩාත් රස විඳී සිංහල ගී එකතුවයි.
ඉතින් මේ සංග්‍රහයේ ගීත දොළස කෙලෙස ද?
- "යුද්දෙටත් ඇවිත්" - හටන් ගී ඇසුරෙන් නිම වී ඇති මෙය රංවල බලකයේ ම පෙර ගියක නව නිමාණයක් වුව, මෙහි ඇති අපූරුතම රසාස්වාදය ගෙන එන්නේ ආත්මා ලියනගේ තම සමාන්‍ය හඬ වෙනස් කරමින් කරන ගායනා විලාශයයි. රන්වල බලකාය ආගන්තුක ගායක ගායිකාවන් තම ගීත සංග්‍රහයන් තුල ට ආරාධනාව අලුත් දෙයක් නොවේ. එහෙත් මේ ගීයේ ආත්මාගේ ගායනාව විශේෂයෙන් ම සුවිශේෂීය.
- රංවල බලකායට උපහාසය තම නිර්මණ වලට එක්කසු කර ගැනීම, නුපුරුදු දෙයක් නොවේ. "අහසේ ඉන්නවලු" නමින් ලයනල් රංවලයන්ගේ නමින් මීට වසර ගණණාවකට පෙර නිකුත් සංයුක්ත තැටියේ සිට මෙය අප දැක ඇත. "ත්‍රී" ගි එක්තුවේ ද "මං මැරිලා" ගීය තුලින් ලාංකිකයා පුරුදු වී ඇති අවමංගල්‍ය ක්‍රමවේදයත්, "ලොකු වුනාම වෙන්නේ කවුද?" මගින් අප රට බහුතරයක් කෙටි මාර්ග මගින් මුදල් ඉපයීමේ ව්‍යායාමයත් හාස්‍යයට ලක් කලේ ය. මෙහි එන සරම් මූණ නම් වූ ගීය මගින් අපට "ටයි දැම්මට සරම් මූණක්" තිබීම ගැනත්, "පොෂ් උනාට චීත්ත මූණ" ගැනත් හාස්‍යයට ලක් කරන්නේ අප පිට දෙසේන් එන දේ බදා ගැනීමට ඇති හදිස්සිය ගැන මතක් කරලමිනි.
-පළමු පැරකුම්බා රජු පිළිබඳ ගැයෙන ගීයක් වන "පුලතිසි නිරිඳෝ" ප්‍රශස්ති ආරෙන්, උඩරට ශාන්තිකර්ම නාද රටා භාවිත කොට නිමැවී ඇත. මෙම ගීය ඇසීමට ප්‍රිය සිතෙන ආරේ ගීයක් වුව ද, මේ සංයුක්ත ගීයේ සමස්ත ලක්ෂණයක් වන, නැවත තමන් පෙර කල නිර්මාණ ආර ට යෑම මෙහි ඇත. රංවල බලකාය "ත්‍රී" හරහා අපට ඉදිරිපත් කල, ජන ගී ආර භාවිතාවෙන් බිහි කල නව ගී සංකල්පනා වලින් බැහැරව නැවත අතීත කිතු ඝොස වෙත වැඩියෙන් යොමු වී ඇති සේ ය. මට ඇති උන පැණ වූයේ 2013-14 දී නව ඉසවු වෙත දැක්ම යොමු කල රංවල බලකාය ( "ත්‍රී" හි "මහා පුරුෂ මිනිස් රුවන", මහබඹාට මූණු දෙකයි", "මං මැරිලා", "අනාගතේ කවුද වෙනේ?" ), 2017-18 වෙද්දි නැවත අතීත කිතු ඝොස ගැන ගැයීමට යොමු වූයේ ඇයි ද යන්න යි.
-අහසත් පොළවත අතර සබඳතාව ඇති කොට, අප රට බතින් පෝෂිත කරන්නා වූ, ඒ උදෙසා අද දවස වන විට දහසක් දුක අනුභව කරන්නා වූ ගොවි පුත්තු ගැන අපූරු ගීතයකි, "හිරුගේ පුතු". එහි ජන ගී ආභාෂය පූර්ණව ඇතත්, විෂයමය වශයෙන් එහි නැවුම් බවක් මෙන්ම, කුමක්දෝ ලෙන්ගතු බවක් ද එහි අන්තර්ගතය. ගීයේ අපූරුව නම් බඹර කවි සහ තෙතඟු ගී යන ආරයන් දෙකේ ආභාෂය ගීයේ වෙන වෙන ම යෙදී ඇති හෙයින්, එම වෙනස ගීය වඩාත් රසවත් ය. අමන්ද්‍යා උත්පලී ගේ ගායන විලාශය අපූරුය.
-"යක්කු බොලව්" ගීය, අපූරු ගායන ආරක් ද, ඊට ම ගැලපෙන සංගීත භාවිතයක් ද තුලින්, තරමක අද්භූත හැඟීමක් ආරෝපනය කරන ගීයකි. මෙලෙස ගායනය තුලින් ගීයට යම් වෙනස් කමක් ගෙන එන ආරේ ගී අගය කල යුතුය. කිම ද අප සිංහල ගීය බොහෝ විට සීමිත ගායන විලාශයන් භාවිතා කරන් බැවිනි. කසුන් කල්හාරගේ " රොමාන්තික ඔපෙරාව" නම් වූ ගී ඇල්බමයේ මේ ගායනා විලාශයන් සමඟ කෙරෙන පරීක්ෂණයන් හා වෙනස් ආරක ගායනායන් ගැන කියා ඇට. ඒ සංගීත සංග්‍රහයේ ගායන විලාශයේ බොහෝ අපූර්වතා ඇත. මේ සංයුක්ත තැටියේ අවම වශයෙන් මේ ගීයේත්, "යුද්ධෙටත් ඇවිදින්" ගීයේ ආත්මා ලියනගේ ගේ සුවිශේෂී ගායනා ද, යම් තරමකින් කට හඬ ද මෙවලමක් ලෙස භාවිතය, ගීය ට ගෙන එන නැවුම්බව ගැන කියා පායි.
- මා බලාපු රංවල බලකායේ සංදර්ශන දෙකක දී ම අමතර අංගයක් ලෙස පෙන්නාපු රජරට වැසිකාලයත් සමඟ මැඩියන් ගේ බාලවිය සිට දිය කඩිති වල දිය සිඳෙනා අවදිය තෙක් උන් හඬ නගනා ආකාරයේ වෙනස නිමිති කොට ගෙන ඉදිරි පත් කල මැඩියා වන්නම. එය පාදක කොට ගෙන නිර්මාණය වූ අපූරු ගීයකි, "සක්වල පුරා". මෙහි එන සමස්ත ගී අයුරින්, ත්‍රී හි නිර්මාණ දිශානතිය - එනම්, ජන ගී ආර මත නූතන ගීත කලාවක් නිර්මාණයේ අපූරුව, ප්‍රදර්ශනය වන අවස්තාවකි මේ ගීය.
- මෙහි එන මා සිත් වඩාත් අඩුවෙන් දිනූ ගීය "මක්කෙයි" විය යුතුය. රුහුණේ බස් භාවිතාව මුල් කොට ගෙන නිමැවී ඇති ගීයේ, ඒ බසේ ඇති යෙදුම් පිළිබඳ අවදානය එහි ගී ස්වරූපය ඉක්මවා යාම නිසා එහි ව්‍යාජ ස්වරූපයක් මතු ව ඇතුවා පමණක් නොව, බස් භාවිතාවේ යෙදුම් කිහිපයක් දුර්වල ගීතයකට ව්‍යායාමයක් දරා ඔබ්බවා ඇති ස්වරූපයක් අරුත් යයි.
එනුමුදු එතනින් ඔබ්බට සංග්‍රහයේ අපූරු ගී හතරක් පෙළ ගැසී ඇත.
-"ඉතිං කැන්දන් යන්නම්", තම සහකාරිය සමඟ තම අනාගාතයත්, දරු මල්ලන් සමඟ දිවිගෙවන අයුරුත් සිතනා මානවකයෙකුගේ මනසින් ලියැවුණු අපූරු ගීයකි. සබරගමු වන්නම් ආශ්‍රෙයෙන් නිමැවී ඇති මේ ගීය ජන ගී ආභාශයත් පරිපූර්ණව රැගත්, එලෙසම සමස්ත වශයෙන් ගීයක් වශයෙන් අසන්නා ට ප්‍රිය ගීයකි.
- රන්වල ළමා බලකාය ගායනය කරන, නිශ්ශංක දිද්දෙනියන් ද පද පෙළක් ගායනයෙන් සම්මාදම් වන "දශ මහ යෝධයෝ" ගීය ද මේ සංග්‍රහයේ ඉහළම තලයේ ගීයකි. පෙර කී "යක්කු බොලව්" ගීය මෙන්ම, මේ ගීය ද සමස්ත අවකාශයක් ගොඩනැඟීමට සමත් ගායනයක්, පද පෙළක් සහ සංගීත සම්මිශ්‍රණයක් රැගත් ගීයකි.
- "අන්දරගේ හාමිනේ" ගීය ද සාර්ථක ගීයකි. අන්දරගේ හාමිනේ ගේ දෘෂ්ටියෙන්, තම සැමියාගේ තැනට සුදුසු නුවණ සහ හාස්‍ය උත්පාද හැකියාව ගැන උදම් අනන පද පෙළකින් සමන්විත මේ ගීය, ඊට උචිත තනිවකින් හා සංගීතයකින් හෙඹිය. ගී මැය පද පෙළට හෝ සමස්ත ගීය අඩාල නොකරයි ( "මක්කෙයි" කලා වගේ )
- මෙහි එන ගී අතරින් මා වඩාත් කැමතිම ගීය කුමක්දැයි අයෙක් විමසුවහොත්, ඒ "ළමිස්සියේ" ගීය විය යුතුය. සී පද ශෛලියෙන් නිමැවී ඇති පෙම් ගීයක් වන මෙහි, ගායකයා වන ප්‍රදීප් මුතුකුඩාආරව්වි අපූරු ගායනයක යෙදෙයි. වරෙක ඔහු ඕසේ ඇල්ලීම තත්ත්පර 15 පමණ තරමක් වෙයි; ඉන් ගීයට ලැබෙන සාංකාවක ඊඟිය හා ළයාන්විත බව ඉතා සුන්දරය.
- ජනනාත් වරකාගොඩ ගයනා, උඩරට ශාන්තිකර්ම නාද රටා සහ ගජගා වන්නම ආශ්‍රයෙන් නිර්මාණය කොට ඇති "මැදුරේ සිරි" ගීය, අප රට සෙන්කඩගල මුල්කරගත් පෙදෙස අලලා නිර්මාණය වු ගීයකි. මෙහි මේ වන විට රංවල බලකාය මගින් බලාපොරොත්තු විය හැකි ගීයක ආර ( සංඥා නද/ Signature sound ) රැගත් ගීයකි.
ඉතින් පෙර කී ලෙස ඇසීම ටැ ප්‍රිය අලුත් සිංහල ගී අසන්නට ලැබීම ම සතුටකි. දැනට පෙනෙනායුරෙන් රංවල බලකාය වසර තුන - හතරකට වරක් අලුත් ගීත සමුච්චියක් එළි දක්වන අයුරකි දිස්වන්නේ. ලයනල් රංවලයන්ගේ ඇවෑමෙන් ඔවුන්ගේ සාර්ථක ම ගී එකතුව "ත්‍රී" යැයි සිතමි ( ත්‍රී වලට මම ****1/2 ප්‍රධානය කලෙමි ). ත්‍රී තුලින් මා දුටුවේ ජන ගී පදනම මත පිහිටා ඔවුන් අප සංස්කෘතිය පමණක් නොව අප වර්ත්මනාය ද කියවීමට තනමින් ඒවා ශ්‍රවණයට ප්‍රිය ගී තුලට තැන්පත් කල ආරකි. "යක්කු බොලව්" හී ඔවුන් අඩියක් පසුපසට ගෙන අප උරුමය ගැන ත්‍රී හී ට වඩෑ අවදානය යොමු කොට ඇත. එහෙත් මේ ගීත් ත්‍රී ගී තරමට ම පාහේ රසවත් ය. මේ ලියමන කියවන්නියකට රංවල බලකායේ ගී ශ්‍රවණයට සිත් ඇති වන්නී, ත්‍රී හා යක්කු බොලව් යන ද්විත්වයම මිලට ගන්නා මෙන් කියා සිටිමි ( නුගේගොඩ "සුපර්මාර්කට්" පරීශ්‍රයේ KND Enterprisesහි රංවල බලකායේ සියළු ගී එකතු ඇත ). එනුමු දු ඔවුන්ගේ මීළඟ ගීත එකතුව උදෙසා ජන ගී ආශ්‍රයෙන් වඩාත් වත්මනහි පිහිටා අපූරු ගී රචනාවන්ට හා සංගීත නිර්මාණයන්ට සිත් ඇති වේවායි පතමි. තව ද, රංවල බලකායේ සජීවී ප්‍රසංග වල ප්‍රේක්ෂකයන්ගේ සිත් දිනා ගන්නා අංගයක් වන විවිධ මාදිලියේ බෙර නාද ඒකල අංගයක්, සංගීත එකතුවකට සුදුසු ලෙස එකතු කරන්නේ නම් මැනවි - එහි ගායනයක් නොවීම ගැටළුවක් නොවනු ඇත.
වඩාත් ප්‍රිය ගී: යුද්දෙටත් ඇවිත්; හිරුගේ පුතු; යක්කු බොලව්; සක්වල පුරා; දසමහා යෝධයෝ; ළමිස්සියේ
රංවල බලකායට සුභ!
No comments:
Post a Comment